ເມືອງສາມັກຄີໄຊ ຈັດພີທີທຳລາຍສິນຄ້າໝົດອາຍຸຫຼາຍລາຍການ

      ເມືອງສາມັກຄີໄຊ ແຂວງອັດຕະປື ໄດ້ຈັດພິທີຈູດທຳລາຍສິນຄ້າໝົດອາຍຸຫຼາຍລາຍການເຊີ່ງປະກອບມີສິນຄ້າບໍລິໂພກ, ອຸປະໂພກ ລວມມູນຄ່າ 5 ລ້ານກວ່າກີບ. ພິທີດັ່ງກ່າວ ໄດ້ຈັດຂື້ນໃນວັນທີ 26 ມິຖຸນາ 2018. ທີ່ເດີ່ນຫ້ອງວ່າການປົກຄອງເມືອງ, ເປັນກຽດເຂົ້າຮ່ວມຂອງທ່ານ ຄຳບຸນ ດວງພະບາງ ເຈົ້າເມືອງເມືອງສາມັກຄີໄຊ, ມີທ່ານ ສຸລິພັນ ສຸວັນເພັນ ຮອງຫົວໜ້າຫ້ອງການວິທະຍາສາດ ແລະ ເຕັກໂນໂລຊີເມືອງ, ຫົວໜ້າຄະນະກຳມະການຄຸ້ມຄອງຈັດສັນຕະຫຼາດ-ຫ້າງຮ້ານຂັ້ນເມືອງ, ມີບັນດາຫົວໜ້າຫ້ອງການ ແລະ ແຂກທີ່ຖືກເຊີນອ້ອມຂ້າງເມືອງສາມັກຄີໄຊເຂົ້າຮ່ວມ.

        ທ່ານ ສຸລິພັນ ສຸວັນເພັນ ຮອງຫົວໜ້າຫ້ອງການວິທະຍາສາດ ແລະ ເຕັກໂນໂລຊີເມືອງ, ຫົວໜ້າຄະນະກຳມະການຄຸ້ມຄອງຈັດສັນຕະຫຼາດ-ຫ້າງຮ້ານຂັ້ນເມືອງ ໄດ້ລາຍງານໃຫ້ຮູ້ວ່າ: ສິນຄ້າທີ່ນຳມາຈູດທຳລາຍໃນຄັ້ງນີ້ ເປັນສິນຄ້າທີ່ເຈົ້າໜ້າທີ່ ຄະນະກຳມະການຄຸ້ມຄອງຈັດສັນຕະຫຼາດ-ຫ້າງຮ້ານຂັ້ນເມືອງໄດ້ເຄື່ອນໄຫວກວດຄົ້ນຢູ່ຕາມຫ້າງຮ້ານຂາຍຍົກ - ຂາຍຍ່ອຍຢູ່ຕະຫຼາດເມືອງໃໝ່ ແລະ ຕະຫຼາດຫຼັກ 3 ໃນກາງເດືອນມິຖຸນາຜ່ານມາ. ຜ່ານການເຄື່ອນໄຫວກວດຄົ້ນ ກໍໄດ້ກວດພົບ ສິນຄ້າໝົດອາຍຸ 22 ຮ້ານ ມີ 17 ລາຍການ, ໃນນັ້ນ ສິນຄ້າປະເພດເຄື່ອງບໍລິໂພກ 15 ລາຍການ, ສິນຄ້າປະເພດເຄື່ອງອຸປະໂພກ 2 ລາຍການ, ກວດພົບສານປົນເປື້ອນໃນອາຫານປະເພດ ກຸ້ງທະເລທີ່ນຳເຂົ້າຈາກປະເທດຫວຽດນາມ 1 ກິໂລ, ເຫັດຫອມ 7 ຖົງ ແລະ ໄດ້ຍຶດຊິງຊັ່ງທີ່ບໍ່ໄດ້ມາດຖານຈຳນວນໜື່ງ ລວມມູນຄ່າ 5 ລ້ານກວ່າກີບ. ປະຈຸບັນ ສິນຄ້າດັ່ງກ່າວໄດ້ຈູດທຳລາຍເປັນທີ່ຮຽບຮ້ອຍແລ້ວໂດຍຊ້ອງໜ້າບັນດາຄະນະຫ້ອງການທີ່ກ່ຽວຂ້ອງທຸກພາກສ່ວນ.

ThamLaiy

ໝາຍບອກ: ຖ້າທ່ານພົບເຫັນ ສິນຄ້າໝົດອາຍຸ ຫຼື ຊິງຊັ່ງທີ່ບໍ່ໄດ້ມາດຕະຖານ ຕາມທ້ອງຕະຫຼາດ ລວມທັງຫ້າງຮ້ານຂາຍສົ່ງ-ຂາຍຍ່ອຍທົ່ວໄປ ໃນທົ່ວເມືອງສາມັກຄີໄຊ ສາມາດແຈ້ງມາທີ່ ຄະນະກຳມະການຄຸ້ມຄອງຈັດສັນຕະຫຼາດ-ຫ້າງຮ້ານຂັ້ນເມືອງ ໂທ: 02098496464, 02055596663 ໄດ້ຕະຫຼອດ 24 ຊົ່ວໂມງ.

ຂ່າວ ແລະ ພາບໂດຍ: ທ. ສຸຫັດ ນຽມທີສອນ ຫ້ອງການ ຖະແຫ່ງຂ່າວ ແລະ ວັດທະນະທຳ ເມືອງສາມັກຄີໄຊ.