ເມືອງສາມັກຄີໄຊ ເຜີຍແຜ່ເອກະສານບັນຫາຊາຍແດນລາວ-ກຳປູເຈຍ

cambodia2

     ວັນທີ 7 ມິຖຸນາ 2018 ນີ້. ທີ່ສະໂມສອນຫ້ອງວ່າການປົກຄອງເມືອງສາມັກຄີໄຊ ແຂວງອັດຕະປື ໄດ້ຈັດກອງປະຊຸມເຜີຍແຜ່ເຊື່ອມຊຶມເອກະສານກ່ຽວກັບສະພາບການຊາຍແດນລາວ - ກຳປູເຈຍຂື້ນ

ໂດຍພາຍໃຕ້ການເປັນປະທານຂອງທ່ານ ທ່ານ ຄຳບຸນ ດວງພະບາງ ກຳມະການພັກແຂວງ ເລຂາພັກເມືອງ ເຈົ້າເມືອງເມືອງສາມັກຄີໄຊ ແຂວງອັດຕະປື, ມີບັນດາທ່ານໃນຄະນະປະຈໍາພັກເມືອງ, ກຳມະການພັກເມືອງ, ຫົວໜ້າຫ້ອງການອ້ອມຂ້າງເມືອງ, ນາຍ ແລະພົນທະຫານ, ນາຍ ແລະພົນຕຳຫຼວດພ້ອມດ້ວຍສະມາຊິກພັກ, ພະນັກງານ - ລັດຖະກອນພາຍໃນເມືອງສາມັກຄີໄຊເຂົ້າຮ່ວມ.

     ກອງປະຊຸມກໍ່ໄດ້ຮັບຟັງການເຜີຍແຜ່ເອກະສານ ຄວາມເປັນຈິງກ່ຽວກັບຈຸດຄົງຄ້າງເສັ້ນຊາຍແດນລະຫວ່າງລາວ - ກຳປູເຈຍ ຈາກທ່ານ ຄຳບຸນ ດວງພະບາງ ກຳມະການພັກແຂວງ ເລຂາພັກເມືອງ ເຈົ້າເມືອງເມືອງສາມັກຄີໄຊ ແຂວງອັດຕະປື ເຊີ່ງທ່ານໄດ້ຍົກໃຫ້ເຫັນເຖິງຈຸດທີ່ຍັງຄົງຄ້າງ 2 ຈຸດທີ່ທັງສອງຝ່າຍຍັງຈະຕ້ອງສືບຕໍ່ແກ້ໄຂຮ່ວມກັນຄື: ບໍລິເວນແມ່ນ້ຳເຊກອງ ແລະ ບໍລິເວນແກ້ງຕໍມໍຄອຍ - ຫ້ວຍຕະເງົາ. 2 ເຂດດັ່ງກ່າວເປັນເຂດທີ່ທັງສອງຝ່າຍມີທັດສະນະຄະຕິທີ່ແຕກຕ່າງກັນກ່ຽວກັບການຂີດເສັ້ນເນັ່ງຊາຍແດນ ເນື່ອງຈາກ ແຕ່ລະຝ່າຍຕ່າງກໍ່ໃຊ້ເອກະສານ ແລະ ແຜນທີ່ທີ່ມີຂໍ້ມູນແຕກຕ່າງກັນ. ດັ່ງນັ້ນ ທັງສອງຝ່າຍຈື່ງໄດ້ພົບປະເຈລະຈາກັນຫຼາຍຫຼົບຫຼາຍຕ່າວເພື່ອຫາທາງອອກໂດຍສັນຕິວິທີ ເຊີ່ງທັງສອງຝ່າຍໄດ້ຕົກລົງກັນວ່າ: ບໍລິເວນທີ່ຍັງເປັນຈຸດຄົງຄ້າງ ເປັນຈຸດຄົງຄ້າງມິດຕະພາບ ແລະ ຫ້າມບໍ່ໃຫ້ມີການດຳເນີນການໃດໆ ໃຫ້ຮັກສາສະພາບເດີມ ຈົນກວ່າຈະສຳເລັດການສຳຫຼວດ ແລະ ປັກຫຼັກໝາຍຊາຍແດນ. ແຕ່ສິ່ງທີໜ້າເປັນຫ່ວງນັ້ນ ຝ່າຍກຳປູເຈຍບໍ່ໄດ້ເຄົາລົບ, ບໍ່ປະຕິບັດ ແລະ ຍັງຝ່າຝືນຄໍາຕົກລົງ ເຊີ່ງເປັນສາເຫດໃຫ້ເກີດສະພາບຄວາມເຄັ່ງຕຶງຕາມບໍລິເວນຊາຍແດນ.

    ທັ້ງນີ້ ກໍ່ເພື່ອໃຫ້ສະມາຊິກພັກ, ພະນັກງານ - ລັດຖະກອນ, ນາຍ ແລະພົນທະຫານ, ນາຍ ແລະພົນຕຳຫຼວດທົ່ວເມືອງສາມັກຄີໄຊ ໄດ້ຮັບຮູ້  ເຂົ້າໃຈຢ່າງຖືກຕ້ອງ ແລະ ຢ່າງເລິກເຊີ່ງ ກ່ຽວກັບສະພາບທີ່ເກີດຂື້ນຢູ່ບໍລິເວນຊາຍແດນ ລະຫວ່າງລາວ - ກຳປູເຈຍ ໃນປະຈຸບັນກໍ່ຄືທິດທາງໃນສະເພາະໜ້າ. ເພື່ອເຮັດໃຫ້ວຽກງານດັ່ງກ່າວ ກາຍເປັນໜ້າທີ່ ແລະ ຄວາມຮັບພິດຊອບຂອງທົ່ວປວງຊົນລາວທັງຊາດເວົ້າລວມ, ເວົ້າສະເພາະ ແມ່ນສະມາຊິກພັກ - ພະນັກງານ ທະຫານ ຕຳຫຼວດ ແລະ ພໍ່ແມ່ປະຊາຊົນທົ່ວເມືອງສາມັກຄີໄຊ ກໍ່ຄືຊາວແຂວງອັດຕະປືໃຫ້ມີສະຕິຕື່ນຕົວ ແລະ ເຂົ້າໃຈຕໍ່ແນວທາງທີ່ພັກ - ລັດວາງອອກ.

ຂ່າວຈາກ: ທ.ສຸຫັດ ນຽມທີສອນ ຫ້ອງການຖະແຫຼງຂ່າວ ແລະ ວັດທະນະນຳເມືອງສາມັກຄີໄຊ