ຄວາມຈິງເບື້ອງຫຼັງບັນຫາຄວາມຂັດແຍ້ງຊາຍແດນລາວ-ກຳປູເຈຍ

    ເມື່ອວັນຈັນທີ 28 ພຶດສະພາ 2018 ທີ່ຜ່ານມາ ໄດ້ມີການເຜີຍແຜ່ເອກະສານ "ຄວາມເປັນຈິງກ່ຽວກັບຈຸດຄົງຄ້າງເສັ້ນຊາຍແດນ ລາວ-ກຳປູເຈຍ” ເຊິ່ງຈັດພິມໂດຍສະຖາບັນວິທະຍາສາດສັງຄົມແຫ່ງຊາດລາວ. ໃນນັ້ນ ໄດ້ມີການລະບຸຂໍ້ເທັດຈິງກ່ຽວກັບບັນຫາຊາຍແດນລາວ-ກຳປູເຈຍ ບັນຫາຊາຍແດນລາວ-ກຳປູເຈຍຫຼາຍຢ່າງ ຕັ້ງແຕ່ປະຫວັດຄວາມເປັນມາທາງດ້ານປະຫວັດສາດແຫ່ງການພົວພັນລະຫວ່າງສອງປະເທດ, ການຕົກລົງລະຫວ່າງສອງປະເທດໃນການສຳຫຼວດ ແລະ ປັກຫຼັກໝາຍຊາຍແດນ ລວມເຖິງວີທິການແກ້ໄຂຂໍ້ຂັດແຍ້ງທີ່ເກີດຂຶ້ນຢ່າງສົມເຫດສົມຜົນ.

      ເອກະສານດັ່ງກ່າວຖືກເຜີຍແຜ່ອອກມາ ໂດຍຈັດພິມເປັນ 3 ພາສາຄື: ພາສາລາວ

, ພາສາອັງກິດ ແລະ ພາສາຂະແມ ທັງນີ້ກໍເພື່ອໃຫ້ສັງຄົມໄດ້ຮັບຂໍ້ມູນກ່ຽວກັບບັນຫາຊາຍແດນລາວ-ກຳປູເຈຍຢ່າງຖືກຕ້ອງ ແລະ ຮັບຮູ້ແນວທາງທີ່ສອງປະເທດຈະດຳເນີນການແກ້ໄຂໃນອະນາຄົດ.

   ໂດຍໜຶ່ງໃນຫົວຂໍ້ທີ່ສຳຄັນເຊິ່ງທາງຜູ້ຈັດພິມຕ້ອງການນຳສະເໜີກໍຄື ຂໍ້ເທັດຈິງຂອງເຫດການທີ່ເກີດຂຶ້ນຕາມບໍລິເວນຊາຍແດນລາວ-ກຳປູເຈຍ ວ່າມີຄວາມເປັນມາແນວໃດກັນແທ້. ເຊິ່ງເຮົາໄດ້ຄັດເອົາເນື້ອຄວາມຂອງເຫດການທັງໝົດມາໃຫ້ຜູ້ອ່ານໄດ້ຮັບຮູ້ນຳກັນ ເຊິ່ງຈຸດເລີ່ມຕົ້ນແມ່ນຕັ້ງແຕ່ເດືອນກຸມພາປີ 2017 ເປັນຕົ້ນມາ.

ຈຸດເລີ່ມຕົ້ນຂອງຄວາມຂັດແຍ້ງ

       ເອກະສານດັ່ງກ່າວລະບຸວ່າ ບັນຫາຄວາມເຄັ່ງຕຶງໃນບໍລິເວນແກ້ງຕໍມໍຄອຍ-ຫ້ວຍຕະເງົາ ແມ່ນສືບເນື່ອງມາຈາກການກໍ່ສ້າງເສັ້ນທາງໂດຍຝ່າຍກຳປູເຈຍ ຢູ່ບໍລິເວນທີ່ທັງສອງຝ່າຍຍັງບໍ່ສຳເລັດການສຳຫຼວດພື້ນທີ່ຕົວຈິງ ເລິກເຂົ້າໄປໃນບໍລິເວນແກ້ງຕໍມໍຄອຍ-ຫ້ວຍຕະເງົາ

       ເລີ່ມຕັ້ງແຕ່ເດືອນກຸມພາ ປີ 2017, ກອງທະຫານຊ່າງແສງ ກະຊວງປ້ອງກັນປະເທດກຳປູເຈຍ ໄດ້ກໍ່ສ້າງເສັ້ນທາງລຽບຕາມເຊກອງຫຍັບເຂົ້າໄປຫາບໍລິເວນແກ້ງຕໍມໍຄອຍ-ຫ້ວຍຕະເງົາ ໂດຍມີການຈັດວາງກຳລັງໄປພ້ອມເປັນຈຸດໆ. ເອກະສານລະບຸວ່າ ການກະທຳດັ່ງກ່າວເປັນການລະເມີດຕໍ່ຂໍ້ຕົກລົງຂອງສອງປະເທດ ທີ່ຫ້າມບໍ່ໃຫ້ມີການກໍ່ສ້າງເສັ້ນທາງ ຫຼື ບຸກເບີກບໍລິເວນຊາຍແດນທີ່ສອງຝ່າຍຍັງບໍ່ທັນໄດ້ສຳຫຼວດຮ່ວມກັນ. ຍ້ອນແນວນັ້ນ ຝ່າຍລາວຈຶ່ງໄດ້ທັກທ້ວງ ເພື່ອໃຫ້ມີການແກ້ໄຂໂດຍສັນຕິວິທີ ແລະ ໄດ້ຂຽນໜັງສືເຖິງທາງການຝ່າຍກຳປູເຈຍ ແລະ ສະເໜີໃຫ້ຝ່າຍກຳປູເຈຍຢຸດຕິການສ້າງເສັ້ນທາງຫຼາຍຄັ້ງ ແລະ ໃນຫຼາຍລະດັບ, ທັງທ້ອງຖິ່ນ ແລະ ສູນກາງ.

       ທາງດ້ານ ນາຍົກລັດຖະມົນຕີຂອງ ສປປ ລາວ ກໍໄດ້ຫາໂອກາດພົບປະກັບທ່ານ ນາຍົກລັດຖະມົນຕີຂອງລາຊະອານາຈັກ ກຳປູເຈຍ ໃນວັນທີ 10 ພຶດສະພາ 2017 ເພື່ອປຶກສາຫາລືແກ້ໄຂໃນໂອກາດເດີນທາງໄປຮ່ວມກອງປະຊຸມເສດຖະກິດໂລກ (World Economic Forum) ທີ່ ນະຄອນຫຼວງພະນົມເປັນ. ໃນໂອກາດນີ້ ທ່ານນາຍົກລັດຖະມົນຕີ ຮຸນເຊນ ກໍໄດ້ເປັນເອກະພາບໃຫ້ຢຸດເຊົາການກໍ່ສ້າງເສັ້ນທາງ ແລະ ໃຫ້ມີການລົງກວດກາພື້ນທີ່ຕົວຈິງຮ່ວມກັນຂອງຄະນະກຳມະການຊາຍແດນຮ່ວມ. ພາຍຫຼັງການພົບປະດັ່ງກ່າວ ຝ່າຍກຳປູເຈຍກໍ່ບໍ່ປະຕິບັດຕາມຄຳຕົກລົງ, ທະຫານຊ່າງແສງກຳປູເຈຍ ຍັງສືບຕໍ່ສ້າງເສັ້ນທາງຈົນມາຮອດບໍລິເວນຫ້ວຍອາໄລ ເຊິ່ງຢູ່ໃນບໍລິເວນແກ້ງຕໍມໍຄອຍ-ຫ້ວຍຕະເງົາ ທີ່ເປັນບໍລິເວນຄົງຄ້າງ ເຊິ່ງເປັນການລະເມີດຕໍ່ການຕົກລົງຂອງການນຳສອງປະເທດ.

      ຕໍ່ສະພາບການດັ່ງກ່າວ ຝ່າຍລາວຈຶ່ງແຕ່ງຕັ້ງກອງທະຫານລາດຕະເວນຢູ່ບໍລິເວນຫ້ວຍອາໄລ ເພື່ອທັກທ້ວງ ແລະ ສະກັດກກັ້ນບໍ່ໃຫ້ຝ່າຍກຳປູເຈຍສືບຕໍ່ບຸກເບີກເສັ້ນທາງ ພ້ອມທັງສະເໜີໃຫ້ຢຸດຕິການກໍ່ສ້າງດັ່ງກ່າວ. ຈາກນັ້ນ ໃນລະຫວ່າງວັນທີ 5-6 ກໍລະກົດ 2017 ທັງສອງຝ່າຍຈຶ່ງໄດ້ສົ່ງຄະນະກຳມະການຊາຍແດນຮ່ວມຂອງທັງສອງປະເທດ ລົງໄປກວດກາພື້ນທີ່ຕົວຈິງ ແຕ່ກໍບໍ່ສາມາດແກ້ໄຂໄດ້. ເຫດການບານປາຍ ຝ່າຍກຳປູເຈຍຍື່ນຄຳຂາດໃຫ້ລັດຖະບານລາວຖອນກຳລັງທະຫານອອກຈາກພື້ນທີ່ໂດຍສືບເນື່ອງຈາກການເຄື່ອນໄຫວຂອງກຳລັງທະຫານເຄື່ອນທີ່ຂອງຝ່າຍລາວ ເພື່ອສະກັດກັ້ນບໍ່ໃຫ້ຝ່າຍກຳປູເຈຍບຸກເບີກເສັ້ນທາງ ຈຶ່ງເປັນສາເຫດໃຫ້ຝ່າຍກຳປູເຈຍກ່າວຫາວ່າ ຝ່າຍລາວລ່ວງລໍ້າອະທິປະໄຕຂອງກຳປູເຈຍ ແລະ ໄດ້ສົ່ງກຳລັງເຂົ້າມາປະຈຳເພີ່ມ ແລະ ເຮັດໃຫ້ເກີດມີສະພາບເຄັ່ງຕຶງຢູ່ບໍລິເວນນີ້, ເອກະສານດັ່ງກ່າວລະບຸ.

       ໃນວັນທີ 11 ສິງຫາ 2017 ຝ່າຍກຳປູເຈຍພາຍໃຕ້ນາຍົກລັດຖະມົນຕີ ຮຸນເຊນ ໄດ້ປະກາດຜ່ານສື່ມວນຊົນ ແລະ ເຟສບຸກ ຍື່ນຄຳຂາດໃຫ້ລັດຖະບານລາວຖອນກຳລັງອອກຈາກອະທິປະໄຕຂອງກຳປູເຈຍພາຍໃນ 6 ວັນ (ວັນທີ 17 ສິງຫາ 2017). ຖ້າບໍ່ດັ່ງນັ້ນຈະດຳເນີນການທາງກຳລັງທະຫານ ເຊິ່ງໃນມື້ດຽວກັນກໍເຮັດໃຫ້ສື່ຕ່າງໆທັງພາຍໃນ ແລະ ສາກົນອອກຂ່າວສະແດງກຳລັງທະຫານຂອງກຳປູເຈຍກຳລັງເຄື່ອນພົນໄປຍັງຊາຍແດນທີ່ຕິດກັບລາວ ເພື່ອຂັບໄລ່ທະຫານລາວອອກຈາກບໍລິເວນຫ້ວຍຕະເງົາ ທີ່ຝ່າຍກຳປູເຈຍປະກາດອ້າງເອົາເອງວ່າເປັນອະທິປະໄຕຂອງຕົນ.

Capture

ຄວາມພະຍາຍາມໃນການແກ້ໄຂທາງການທູດຂອງທັງສອງຝ່າຍ

      ກ່ອນໜ້ານັ້ນ ໃນວັນທີ 7 ສິງຫາ 2017 ກະຊວງການຕ່າງປະເທດລາວໄດ້ຮັບຈົດໝາຍຂອງນາຍົກລັດຖະມົນຕີ ຮຸນເຊນ ສະບັບລົງວັນທີ 2 ສິງຫາ 2017 ເຖິງນາຍົກລັດຖະມົນຕີ ທອງລຸນ ສີສຸລິດ ຈາກສະຖານທູດກຳປູເຈຍປະຈຳລາວ ເພື່ອສະເໜີໃຫ້ຝັ່ງລາວຖອນກຳລັງອອກຈາກບໍລິເວນຫ້ວຍອາໄລ ທີ່ອ້າງວ່າເປັນອະທິປະໄຕຂອງກຳປູເຈຍຢ່າງບໍ່ມີເງື່ອນໄຂ ແລະ ສະເໜີໃຫ້ຝ່າຍລາວຮັບຂໍ້ສະເໜີຂອງຝ່າຍກຳປູເຈຍໃນການແກ້ໄຂ 4 ຈຸດທີ່ຕົກລົງກັນແລ້ວຄືນໃໝ່.

      ມາຮອດຕອນເຊົ້າວັນທີ 12 ສິງຫາ 2017 ນາຍົກລັດຖະມົນຕີກຳປູເຈຍ ໄດ້ເດີນທາງມານະຄອນຫຼວງວຽງຈັນ ເພື່ອພົບປະກັບນາຍົກລັດຖະມົນຕີແຫ່ງ ສປປ ລາວ ແລະ ຕອນເຊົ້ານັ້ນເອງກໍໄດ້ພົບປະປຶກສາຫາລືຫາວິທີທາງອອກຮ່ວມກັນເປັນການດ່ວນ ແລະ ໄດ້ເປັນເອກະພາບໃຫ້ທັງສອງຝ່າຍຖອນກຳລັງທະຫານທັງໝົດຂອງຕົນອອກຈາກບໍລິເວນຫ້ວຍອາໄລກັບໄປກົມກອງເດີມ. ມອບໃຫ້ກະຊວງການຕ່າງປະເທດກໍຄືຄະນະກຳມະການຊາຍແດນຂອງສອງຝ່າຍ ສືບຕໍ່ປຶກສາຫາລືເຈລະຈາແກ້ໄຂບັນຫາຮ່ວມກັນເປັນປົກກະຕິເມື່ອມີບັນຫາໃດທີ່ເກີດຂຶ້ນ.

ຂໍຂອບໃຈແຫຼ່ງຂ່າວ: https://muan.sanook.com